Од Либерално-демократската партија (ЛДП) денеска преку соопштение упатија критики до Владата по посетата на претседателката на Индија, оценувајќи дека Македонија не успеала да обезбеди конкретни економски придобивки, за разлика од Молдавија и Романија.
Од партијата тврдат дека за време на регионалната турнеја на индиската претседателка, Молдавија и Романија потпишале меморандуми и договориле соработка во повеќе области, меѓу кои земјоделството, фармацијата, информатичката технологија и логистиката, додека во Македонија, според нив, посетата се свела на протоколарни активности.
Во соопштението ЛДП наведува дека наместо конкретни договори и инвестиции, биле организирани свечени приеми и дипломатски настани без, како што тврдат, ниту еден потпишан договор.
Партијата ги повикува Владата и Министерството за надворешни работи и надворешна трговија да објаснат како планираат да ја реализираат најавената амбиција за трговска размена со Индија од 400 милиони долари, посочувајќи дека, според нив, сè уште постојат пречки како визниот режим, недостигот на директен карго-превоз и отсуството на правна рамка за олеснување на економската соработка.
Од ЛДП оценуваат дека Молдавија, која според нив некогаш била зад Македонија во евроинтегративниот процес, денес претставува пример за успешна економска дипломатија. Партијата повикува Владата да се насочи кон, како што наведува, конкретни резултати, инвестиции и поддршка за домашното стопанство, наместо кон протоколарни активности и јавни настапи.
