Либерално-демократската партија (ЛДП) преку соопштение оцени дека самиот закон за проектот „Скопје – Европска престолнина на културата 2028“ не е спорен, но предупредува дека предложените решенија можат да создадат простор за нетранспарентно трошење на јавните средства и злоупотреби при јавните набавки.
Од партијата посочуваат дека вакви проекти успешно се реализираат низ Европа, но проблемот, според нив, настанува кога законските решенија се користат за ограничување на јавната контрола и концентрирање на одлучувањето.
ЛДП смета дека проектот треба да биде пример за транспарентност, а не механизам за, како што наведуваат, прикривање на тендери и партиски влијанија.
Во посебна објава, претседателката на ЛДП и пратеничка Моника Зајкова истакнува дека со отстранување на транспарентноста и одговорноста не се гради европски проект, туку систем во кој јавните набавки полесно можат да бидат злоупотребени.
Таа наведува дека предлог-законот предвидува располагање со повеќе од 21 милион евра јавни средства, концентрирани овластувања и посебен режим за јавни набавки, без јавна дебата и без антикорупциска анализа.
Зајкова додава дека „Скопје заслужува титула Европска престолнина на културата, а не европска фасада за старите криминални навики“, повикувајќи проектот да се реализира во интерес на граѓаните и со целосна транспарентност.
