Либерално-демократската партија (ЛДП) преку соопштение го поздрави потпишувањето на договорите со Европската Унија, Европската инвестициска банка и Европската банка за обнова и развој за финансирање на третата фаза од железничкиот Коридор 8, оценувајќи дека станува збор за значаен чекор во поврзувањето на Македонија со европската транспортна мрежа.
Од партијата посочуваат дека проектот е важен за регионалната поврзаност, економскиот развој и европската интеграција на државата.
Во соопштението потсетуваат дека Македонија претходно изгубила околу 60 милиони евра европски грант за истиот проект поради неисполнување на роковите и слабата реализација, оценувајќи дека такви пропусти не смеат повторно да се случат.
ЛДП наведува дека со години се залага инфраструктурните проекти што ја поврзуваат државата со Европа да се третираат како национален интерес и да не бидат предмет на дневнополитички пресметки.
Од партијата очекуваат по потпишувањето на договорите да следува навремена, ефикасна и транспарентна реализација на проектот, нагласувајќи дека на државата ѝ се потребни конкретни резултати, а не само свечени потпишувања.
Воедно, ЛДП порачува дека ќе продолжи да ги поддржува сите проекти кои придонесуваат за поблиска интеграција на Македонија со Европската Унија, подобра регионална поврзаност и економски развој.
