ЛДП: Предупредувавме, поставувавме пратенички прашања, баравме одговорност – денес онколошките пациенти повторно се без терапија

Либерално-демократската партија (ЛДП) преку соопштение изрази поддршка за онколошките пациенти, кои за утре најавија протест пред Министерството за здравство, оценувајќи дека е недозволиво лицата кои се борат со најтешки болести повторно да остануваат без неопходната терапија.

— реклама —

Од партијата посочуваат дека уште минатата година предупредувале оти недостигот од онколошка терапија не е изолиран случај, туку сериозен системски проблем, за кој, како што велат, барале одговорност од Министерството за здравство.

„Наместо решение, денес повторно сме сведоци на истиот срам. За секој ден без терапија некој мора да одговара. Не може секојпат кога ќе се испразнат залихите виновник да нема, а последиците секогаш да ги трпат пациентите“, наведуваат од ЛДП.

— реклама —

Партијата бара итно обезбедување на целата неопходна онколошка терапија, целосна јавна информација за причините за недостигот, утврдување лична и политичка одговорност за институционалните пропусти, како и подготовка на план што ќе гарантира дека ваквата состојба нема повторно да се случи.

— реклама —

Според ЛДП, држава која не може да обезбеди лекови за најтешко болните нема право да зборува за успеси во здравството, бидејќи, како што нагласуваат, за онколошките пациенти секој изгубен ден може да значи загубен човечки живот.