По завршувањето на прославите по повод 35 години независност, Либерално-демократската партија (ЛДП) преку соопштение повторно го отвори прашањето за двојното државјанство на носителите на јавни функции и побара од Собранието да го разгледа законското решение со кое би се ограничило неговото поседување.
Од ЛДП велат дека додека државата ја одбележувала годишнината со концерти и други настани, предлог-законот за укинување на двојното државјанство за пратениците сè уште е заглавен во собраниска процедура.
„Додека со разни панаѓури и концерти си прославија 35 години од осамостојувањето на Македонија, Законот за укинување на двојното државјанство на пратениците сè уште седи заглавен некаде во собраниските лавиринти“, наведуваат од партијата.
ЛДП оценува дека, покрај декларативното изразување патриотизам, важна е и лојалноста на пратениците и останатите функционери кон државата. Од партијата особено ги прозваа пратениците од ВМРО-ДПМНЕ, кои се меѓу предлагачите на законските измени, да се изјаснат за нивното донесување.
Претседателката на ЛДП и пратеничка Моника Зајкова, како што наведуваат од партијата, со јавно објавен заверен нотарски акт побарала и останатите пратеници да покажат дека, како неа, поседуваат само македонско државјанство.
Од ЛДП тврдат дека досега, освен Зајкова, останатите пратеници не покажале подготвеност јавно да ја потврдат состојбата со нивното државјанство.
Партијата повторно бара измените да се донесат што поскоро и ограничувањето да важи не само за пратениците, туку и за министрите, директорите, јавните обвинители, судиите и другите носители на јавни функции.
„Нема потреба од половични решенија, „ќе важи за овој мандат, ќе важи за другиот мандат“, „ќе важи за едните, ама нема да важи за другите““, порачаа од ЛДП.
Од партијата предлагаат и сите актуелни функционери да ги достават на увид своите досиеја за државјанството, а оние кои поседуваат двојно државјанство да се откажат од второто или да поднесат оставка.
„Сè останато е купување време и замајување на јавноста, но и отвора сериозни сомнежи за тоа дали извршителите на државните функции вистински ги штитат интересите на Македонија, или пак на некоја друга држава“, се наведува во реакцијата на ЛДП.
