ЛДП: „Туристичка агенција МВР“ – Премиерот го нема ни за лек, а бегалците слават на слобода

Либерално-демократската партија (ЛДП) преку соопштение упати остри критики до Владата и безбедносните институции по случаите со Ива Михаилова и Артан Груби, оценувајќи дека настаните отвораат сериозни прашања за контролата на државната граница и владеењето на правото.

— реклама —

Од партијата прашуваат каде е премиерот Христијан Мицкоски и зошто не се огласува за, како што наведуваат, големиот скандал што ги засега повеќе министерства и служби. Според ЛДП, премиерот е присутен на отворања и јавни настани, но го нема кога треба да се преземе одговорност за сериозни пропусти во институциите.

ЛДП го посочува случајот со Ива Михаилова, за која тврди дека ја напуштила Македонија без соодветна евиденција, и излегувањето на Артан Груби од притвор. Од партијата оценуваат дека овие настани создаваат впечаток оти законите не важат подеднакво за сите граѓани.

— реклама —

Во реакцијата се наведува и дека министерот за внатрешни работи Панче Тошковски потврдил оти Михаилова ја напуштила земјата, додека надлежните ги проверуваат снимките од граничните премини. ЛДП смета дека ваквите околности бараат јасни одговори од институциите за начинот на кој се контролира границата и за евентуалната одговорност на надлежните.

— реклама —

Партијата ја критикува власта и за трошењето јавни средства за прослави, концерти и споменици, оценувајќи дека институциите наместо да ја исполнуваат својата должност, се обидуваат да ја избегнат одговорноста. Според ЛДП, случаите со Михаилова и Груби ја продлабочуваат недовербата на граѓаните во правосудниот систем.

„Ако премиерот, министрите и раководителите на безбедносните служби не можат да ја чуваат сопствената државна граница ниту да воспостават владеење на правото, најмалку што можат да сторат е да си поднесат оставки“, порачуваат од ЛДП.

Од партијата бараат итна ревизија на правосудниот систем и одговорност од надлежните, предупредувајќи дека без конкретни мерки довербата во институциите дополнително ќе се намалува.