ЛДП: ВМРО да докаже оваа недела дали приоритет им е Законот за Пандов или Законот за укинување на двојното државјанство

Либерално-демократската партија (ЛДП) преку соопштение бара ВМРО-ДПМНЕ во текот на оваа недела јасно да покаже дали приоритет му е предложениот Закон за Пандов или законските измени со кои би се ограничило, односно укинало поседувањето двојно државјанство кај носителите на јавни функции.

Од ЛДП велат дека поминале пет дена, а од владејачката партија сè уште нема одговор на нивните обвинувања за, како што оценуваат, злоупотреба на скратената постапка при носењето на законските измени поврзани со Законот за извршување на санкции.

— реклама —

„Владејачките мислат дека народот страда од амнезија и заборави што зборуваа на митинзи додека беа во опозиција и во изборните кампањи“, наведуваат од ЛДП, обвинувајќи ја ВМРО-ДПМНЕ дека денес ги применува практиките што претходно ги критикувала како „партиски инженеринг“ и „закони скроени по мерка на поединци“.

— реклама —

Од ЛДП прашуваат зошто се предлага бришење на конкретни услови и критериуми во Законот за извршување на санкции, како и зошто, според нив, се заобиколуваат системските процедури при донесувањето на законските измени.

Партијата посочува дека предлогот е поднесен од група пратеници наместо од Владата и дека, според нив, не бил објавен на ЕНЕР, не бил оставен рок од 20 дена за јавна расправа и била избегната Проценката на влијанието на регулативата (ПРИ).

— реклама —

Од ЛДП сметаат дека пратениците оваа недела имаат можност да изберат меѓу, како што велат, „скроени по мерка закони“ и предлозите за укинување на двојните државјанства кај носителите на највисоки јавни функции.

„ЛДП бара наместо брзоплето носење на Законот за Пандов, конечно да се ограничи поседувањето на повеќе државјанства на функционерите и да покажат дека навистина се грижат за иднината и за доброто на граѓаните во државата“, велат од партијата.

Од ЛДП додаваат дека сè друго би претставувало остварување на лични и теснопартиски интереси, додека граѓаните, според нив, наместо конкретни резултати се соочуваат со секојдневни партиски соопштенија за наводни успеси.