ЛДП за скандалот со Ива Михајлова: А да го укинеме судството, ионака не добива пари колку треба од Владата, а и министерствата не функционираат

Либерално-демократската партија (ЛДП) преку соопштение остро реагира на случајот со Ива Михаилова, оценувајќи дека тој ја покажува сериозната нефункционалност на државните институции и отвора прашања за владеењето на правото во Македонија.

— реклама —

Од партијата посочуваат дека случајот не треба да се користи за поттикнување етнички поделби и националистички кампањи, туку да се разгледува низ призмата на одговорноста на институциите. Пораките што, според ЛДП, биле испратени од Софија ги оценуваат како скандалозни и сметаат дека укажуваат на сериозни проблеми во правосудниот систем.

Од ЛДП наведуваат дека треба да се испита и дали со постапките во овој случај се сторени нови кривични дела. Особено ги критикуваат изјавите на адвокатот на Михаилова, кој, според партијата, со тврдењето дека ја „зеле судбината во свои раце“ дополнително ја продлабочил правната и институционалната криза.

— реклама —

Партијата оценува дека е недозволиво лице обвинето во постапка за сообраќајна несреќа со смртни последици, наместо да се соочи со правдата и да ги почитува судските ограничувања, да биде претставувано како жртва. Од ЛДП велат дека случајот предизвикува огорченост кај јавноста и ја нагласува потребата од одговорност.

— реклама —

Според партијата, во државата треба да функционираат полицијата, безбедносните камери на граничните премини и службите задолжени да спречат излез од земјата на лица со одземени пасоши и изречени забрани. ЛДП прашува како било можно да се случи ваков случај доколку институциите ги извршувале своите надлежности.

Од партијата сметаат дека измените на Кривичниот законик и ослободувањето од одговорност на функционери испратиле порака дека лицата на власт можат да постапуваат без последици. Според нив, случајот со Михаилова дополнително го засилува впечатокот дека институционалниот систем се движи кон хаос и анархија.

ЛДП предупредува на растечко незадоволство кај граѓаните и оценува дека е потребна заедничка реакција за да се запре, како што наведува партијата, натамошното пропаѓање на државните институции.