Левица преку соопштение реагира на зголемениот број случаи на западнонилска треска во Македонија, обвинувајќи ја власта предводена од ВМРО-ДПМНЕ за несоодветна и задоцнета реакција на здравствената состојба.
Од партијата велат дека Македонија, според најновите податоци на Европскиот центар за превенција и контрола на болести (ECDC), има највисока стапка на случаи на западнонилска треска по глава на жител меѓу земјите опфатени во пресекот. Според податоците заклучно со 13 август, во Европа биле регистрирани 429 локално стекнати случаи, додека Македонија била четврта според апсолутниот број случаи.
Левица наведува дека стапката во Македонија изнесувала околу 1,65 случаи на 100.000 жители, што според партијата е повеќе од 60 проценти над стапката во Грција, повеќе од четири пати над италијанската и околу 19 пати над шпанската.
Од Левица додаваат дека состојбата во земјава во меѓувреме дополнително се влошила. Според најновите податоци на Институтот за јавно здравје, заклучно со 18 август се регистрирани 38 случаи – 36 потврдени и два веројатни, од кои 37 се автохтони. Четири лица починале, а сите регистрирани случаи се со невроинвазивна форма на заболувањето, односно енцефалитис и/или менингитис. Националната инциденца, според партијата, достигнала 2,1 случај на 100.000 жители.
Само во периодот од 12 до 18 август биле регистрирани 12 нови случаи и три смртни исходи. Тоа значи дека бројот на регистрирани случаи се зголемил од 26 на 38 за само седум дена, односно за 46,2 проценти.
Левица посочува дека првиот човечки случај во европскиот регион за сезоната 2026 бил регистриран во Македонија уште во мај. Според партијата, раниот сигнал не бил проследен со доволно ефикасни превентивни мерки, а до август состојбата ескалирала.
До 11 август бројот на случаи достигнал 26, додека во пет скопски општини веќе била прогласена епидемија. Од Левица обвинуваат дека власта имала доволно време за реакција, но наместо тоа, според нив, дозволила здравствениот ризик да прерасне во сериозна епидемиолошка состојба.
Од партијата прават споредба и со претходниот период. Според нивните податоци, од 2011 до крајот на 2025 година Македонија регистрирала 54 лабораториски потврдени случаи и пет смртни случаи од западнонилска треска. Само во 2026 година досега се регистрирани 36 потврдени случаи, што претставува две третини од бројот на потврдените случаи во претходните 15 години заедно.
Левица оценува дека западнонилската треска не е ново заболување за здравствените институции, бидејќи вирусот со години е присутен во земјата, а познати се начинот на пренос и периодот во кој постои најголем ризик од ширење.
Од партијата ја повикуваат власта да преземе одговорност и да објасни дали и какви превентивни мерки биле преземени по појавата на првите случаи. Воедно, ја обвинуваат ВМРО-ДПМНЕ дека со Министерството за здравство, Институтот за јавно здравје, центрите за јавно здравје и локалните власти има директна одговорност за справувањето со состојбата.
„ДПМНЕ доби конкретно предупредување уште во мај, а три месеци подоцна Македонија доби епидемија“, велат од Левица, додавајќи дека бројките, според нив, се показател за задоцнета превенција и недоволна институционална реакција.
