Дизелот достигна 101,5 денари за литар, а Левица преку соопштение ја обвинуваат Владата дека не презема доволно мерки за да го ублажи ударот врз граѓаните и стопанството. Партијата бара повторно намалување на ДДВ-то за дизелот од 18 на 10 отсто.
Од „Левица“ посочуваат дека од 28 февруари, кога започнаа американско-израелските напади врз Иран, цената на дизелот во Македонија пораснала од 71 на 101,5 денари, односно за околу 43 отсто. Според нивните пресметки, полнењето резервоар од 50 литри сега чини 5.075 денари, што е за 1.525 денари повеќе во споредба со периодот кога литар дизел чинел 71 денар.
Од партијата велат дека светската криза има влијание врз цените, но оти тоа не ја ослободува Владата од обврската да преземе мерки. Според „Левица“, во актуелната цена на дизелот акцизата изнесува 11,50 денари, додека ДДВ-то е 18 отсто, што значи дека даночните давачки учествуваат со речиси 27 денари во крајната цена.
Партијата потсетува дека во март ДДВ-то за горивата беше намалено од 18 на 10 отсто, мерка за која Владата тогаш тврдеше дека носи намалување од шест до седум денари по литар. Од „Левица“ бараат оваа мерка повторно да се воведе и да важи најмалку до 31 декември.
Дополнително, од партијата ја повикуваат Владата да разговара со ОКТА за ново намалување на цената. Тие потсетуваат дека од 24 март до 18 мај компанијата обезбедувала доброволен попуст од три денари за литар дизел, додека во јуни попустот продолжил само за бензините.
„Левица“ ја повикува и Регулаторната комисија за енергетика да ги преиспита регулираните ставки што учествуваат во крајната цена, меѓу кои, како што наведуваат, има трошоци за складирање, трговска маржа и транспорт.
Од партијата го отвораат и прашањето за сопственичката историја на ОКТА, потсетувајќи дека во 1999 година Владата предводена од ДПМНЕ продала околу 54 отсто од компанијата за 32 милиони долари на грчки инвеститор.
Според „Левица“, поскапувањето на дизелот нема да ги погоди само возачите, туку ќе предизвика дополнителни трошоци во транспортот, земјоделството, производството, храната и услугите.
