Левица реагира на најавеното гласање во Советот на Општина Пехчево за иницијатива за изградба на дата-центар на пет парцели во Панчарево, оценувајќи дека за проект со потенцијално значително влијание врз потрошувачката на електрична енергија, водата и инфраструктурата, јавноста досега не добила доволно информации.
Од партијата велат дека не се објавени податоци за инвеститорот, очекуваната потрошувачка на електрична енергија и вода, потребната инфраструктура, економската корист за општината, ниту, како што наведуваат, е одржана јавна расправа за проектот.
„За ваков објект, кој потенцијално може да биде огромен потрошувач на електрична енергија и вода, јавноста не знае речиси ништо“, велат од Левица, од каде што прашуваат кој и зошто брза со реализацијата на иницијативата.
Како аргумент во своите критики, од партијата се повикуваат и на истражување објавено во научното списание „Nature Communications“, во кое се анализира влијанието на дата-центрите врз потрошувачката на електрична енергија и вода, како и врз локалните трошоци за електрична енергија.
Од Левица посочуваат и на примерот со Ирска, каде што, според нив, дата-центрите во 2025 година учествувале со 23 отсто во вкупната измерена потрошувачка на електрична енергија, наспроти пет отсто во 2015 година.
Партијата потсетува дека во Собранието се спротивставила и на измените на Законот за градење и Законот за урбанистичко планирање, со кои дата-центрите се прогласуваат за објекти од национално значење и се предвидуваат забрзани постапки за нивна реализација.
„Пред државата да отвора врата за вакви проекти, мора да знаеме кој инвестира, колку струја ќе троши, колку вода ќе троши, кој ќе ја гради потребната инфраструктура, кој ќе ја плаќа и што конкретно добиваат граѓаните“, наведуваат од Левица.
Од партијата оценуваат дека енергетските ресурси на Македонија не се неограничени и дека приоритет треба да бидат домаќинствата, јавните услуги и домашното производство.
„Не може државата да обезбедува ресурси и инфраструктура, а приватниот инвеститор да ја зема добивката“, велат од Левица.
Во реакцијата партијата го прозива и градоначалникот на Пехчево, Александар Китански, како и советниците од ДПМНЕ, ЗНАМ и СДСМ, кои утре треба да одлучуваат за иницијативата.
Од Левица потсетуваат и на предизборните ветувања на Китански за „чиста и енергетски ефикасна општина“, посочувајќи дека тогаш зборувал за заштита на чистиот воздух, реките и природата во Пехчево.
„Од енергетски ефикасна општина до енергетска база за дата-центар – тоа ли е ‘сигурната иднина’ што ДПМНЕ му ја вети на Пехчево?“, прашуваат од партијата.
Од Левица бараат градоначалникот да објасни какви конкретни придобивки би имала општината од проектот, колку работни места би биле отворени, какви приходи би се слевале во општинскиот буџет и колкава би била потрошувачката на електрична енергија и вода.
Партијата ги повикува советниците да гласаат против иницијативата, а граѓаните на Пехчево да се спротивстават на, како што велат, одлука што може долгорочно да го определи начинот на користење на ресурсите на општината.
