Левица реагираше на најновиот Извештај на Европската комисија за владеењето на правото, оценувајќи дека документот претставува сериозна критика за, како што наведуваат, начинот на кој Владата, предводена од премиерот Христијан Мицкоски, се справува со корупцијата и со функционирањето на институциите.
Од партијата тврдат дека Европската комисија констатира оти корупцијата и натаму е широко распространета, дека високопрофилните случаи ретко завршуваат со правосилни пресуди и дека постојат слабости во законската рамка и во работата на институциите задолжени за спречување на корупцијата.
Левица се повикува и на податоците наведени во извештајот, според кои 92 проценти од граѓаните сметаат дека корупцијата е широко распространета, додека само 32 проценти веруваат дека постојат доволно успешни постапки кои имаат одвраќачки ефект.
Во реакцијата се наведува дека измените на Кривичниот законик не ги отстраниле слабостите што претходно биле посочувани, туку, според Левица, оставиле сериозни недостатоци во гонењето на злоупотребата на службената положба. Партијата потсетува дека во собраниската постапка поднела амандмани за построга казнена политика, но тие не биле прифатени.
Левица како пример го посочува и предметот „Талир 2“, оценувајќи дека неговиот судски епилог е показател за проблемите во борбата против високата корупција.
Во реакцијата се осврнува и на работата на Државната комисија за спречување на корупцијата, наведувајќи дека извештајот на Европската комисија укажува на намалена активност на институцијата во отворањето предмети по сопствена иницијатива, како и на нарушен кредибилитет поради случаите поврзани со нејзините членови.
Од Левица оценуваат дека Владата не успеала да воспостави поефикасен систем за борба против корупцијата и ја повикуваат да преземе конкретни мерки за зајакнување на владеењето на правото.
