Левица преку соопштение оцени дека обезбедувањето флаширана вода за жителите на Гостивар не е доволно за справување со состојбата предизвикана од контаминираниот водоснабдителен систем и побараа Владата да преземе поширок пакет мерки.
Од партијата наведуваат дека обезбедувањето флаширана вода претставува неопходна почетна интервенција, но сметаат дека тоа не ја исполнува законската, здравствената и моралната обврска на државата. Според нив, Законот за здравствената заштита ја обврзува државата да обезбеди заштита од штетното влијание на загадената вода, спречување и сузбивање на заразни болести и обезбедување хигиенско-епидемиолошки минимум за населението.
Од Левица посочуваат дека на граѓаните не им е потребна само вода за пиење, туку и доволно количество здравствено исправна вода за подготовка на храна, одржување лична хигиена и секојдневните потреби во домаќинствата.
Партијата бара Владата да распореди доволен број цистерни со исправна вода во сите населени места, да воспостави јасен распоред за снабдување и да организира достава до старите лица, хронично болните, лицата со попреченост и семејствата кои не можат самостојно да обезбедат вода.
Воедно, од Левица предлагаат бесплатно обезбедување средства за хигиена и дезинфекција, испраќање дополнителни медицински екипи во Гостивар, организирање мобилни тимови и телефонска линија за поддршка, како и обезбедување бесплатна терапија според лекарска процена.
Од партијата сметаат дека е потребна и организирана дезинфекција на објектите со зголемен ризик, како и постојан санитарен и лабораториски надзор на водоводниот систем, со редовно јавно објавување на резултатите од анализите.
Во соопштението, Левица ја обвинува Владата дека не ја третира ситуацијата како сериозна државна криза и повикува на, како што наведуваат, целосна мобилизација на државните капацитети за надминување на состојбата во Гостивар.
