Левица ја напушти седницата на Советот на Скопје: „Советничките прашања се претворија во режирана претстава“

Советничката група на Левица ја напушти денешната седница на Советот на Град Скопје посветена на советнички прашања, во знак на протест против начинот на кој се организира поставувањето прашања и давањето одговори.

Од партијата тврдат дека според новиот модел, советниците се принудени сите прашања да ги постават на почетокот на седницата, по што одговорите ги добиваат „топтан“, без можност за непосредна расправа, дополнителни прашања или соочување со градоначалникот, директорите на јавните претпријатија и градската администрација.

— реклама —

Левица оценува дека со тоа се губи суштината на советничкиот надзор врз градската власт

„Советничките прашања се еден од основните механизми преку кои избраните претставници на народот ја контролираат градската власт и бараат одговорност за начинот на кој се управува со парите и ресурсите на скопјани“, велат од партијата.

— реклама —

Според нив, ваквиот начин на водење на седницата претставува и кршење на Деловникот за работа на Советот на Град Скопје.

Левица го обвинува градоначалникот Орце Ѓорѓиевски дека, заедно со советниците од ВМРО-ДПМНЕ, го наметнува начинот на кој ќе се водат седниците, без да се зема предвид ставот на останатите советници.

„Советот на Град Скопје не е продолжена рака на градоначалникот, ниту советниците се статисти во однапред режирана претстава“, порачаа од Левица.

— реклама —

Партијата го критикува и СДСМ, наведувајќи дека нивните советници останале на седницата и со тоа, според Левица, фактички го прифатиле начинот на работа.

Од Левица велат дека проблемот е и во тоа што, кога одговорите се даваат откако сите прашања веќе се поставени, советниците немаат можност веднаш да реагираат доколку сметаат дека одговорот е нецелосен или дека се избегнува суштината на прашањето.

— реклама —

„На тој начин се одзема можноста да се постави дополнително прашање, да се укаже на избегнат одговор и јавно да се соочи градската власт со сопствената одговорност“, велат од партијата.

Левица најавува дека нема да учествува во ваков формат и дека денешното напуштање на седницата е протест против, како што велат, ограничувањето на демократската контрола и деградирањето на улогата на советниците.