Левица: Клековски го остави Фондот за здравство со милионски проблеми, ДПМНЕ го награди со министерска функција

Левица преку соопштение обвини дека поранешниот директор на Фондот за здравствено осигурување (ФЗО), Сашо Клековски, наместо да сноси одговорност за, како што велат, сериозните пропусти констатирани во ревизорскиот извештај, бил именуван за министер за здравство.

— реклама —

Од партијата наведуваат дека според наодите на Државниот завод за ревизија, Фондот се соочува со финансиски и системски слабости, меѓу кои и повеќе од 136 милиони евра непрефрлени придонеси од ПИОМ, што, според нив, негативно влијае врз ликвидноста на институцијата.

Левица посочува и дека Фондот води судски спор со германска болница која бара повеќе од 430.000 евра за лекување на македонски пациенти поради, како што тврдат, неисполнети финансиски обврски. Дополнително, според партијата, значителен дел од препораките на ревизорите остануваат неспроведени веќе трета година по ред.

— реклама —

Од Левица оценуваат дека ваквите состојби придонеле за финансиска неизвесност во здравствениот систем, што, според нив, се одразува преку доцнење на исплати, проблеми во функционирањето на здравствените установи и судски постапки со странски болници.

— реклама —

Партијата смета дека најголем дел од констатираните пропусти се однесуваат на периодот кога со Фондот раководел Клековски и оценува дека наместо политичка одговорност, тој бил унапреден на функцијата министер за здравство.

Воедно, Левица го критикува и изборот на актуелниот директор на Фондот, Златко Перински, оценувајќи дека на институцијата ѝ е потребно стручно и кредибилно раководство кое ќе ги надмине долгогодишните проблеми.

— реклама —

Од партијата бараат Перински јавно да претстави конкретен план со рокови за спроведување на сите ревизорски препораки, решавање на проблемот со неплатените придонеси, затворање на судските спорови што го оптоваруваат Фондот и воспоставување механизми што ќе спречат повторување на истите пропусти во иднина.