Левица преку соопштение реагираат на обвинението против Артан Груби, оценувајќи дека најавуваната пресметка со високата корупција завршила со многу поблага правна квалификација од онаа со која започна истрагата.
Од партијата потсетуваат дека Обвинителството на 16 декември 2024 година отвори истрага против Груби за „проневера во службата“, при што било соопштено дека постои основано сомнение за дејствија поврзани со противправна корист од 501.319.119 денари.
Левица посочува и дека на 24 февруари 2026 година Обвинителството соопштило дека постапката против Груби продолжува токму за проневера и дека по истрагата биле обезбедени најголемиот дел од потребните докази.
Од партијата прашуваат како истрагата за дело за кое е предвидена казна затвор од најмалку четири до 20 години, по неколку месеци завршила со обвинение за дело со казна до најмногу пет години.
„Јавноста има право да праша како докази што тогаш беа обезбедени исчезнаа во нивната правна анализа за шест месеци и како истрагата за дело со казна од најмалку четири до дваесет години заврши со обвинение за дело за кое казнената рамка оди најмногу до пет години?“, наведуваат од Левица.
Од партијата потсетуваат и на случајот со недостапноста на Груби, кој, како што велат, околу 14 месеци бил надвор од земјата и не бил обезбеден од надлежните институции. По неговото враќање, Обвинителството побарало куќен притвор, со образложение дека најголемиот дел од доказите веќе биле обезбедени.
Левица бара Обвинителството да објасни кој елемент од првично истражуваното кривично дело не бил потврден со доказите, кои факти довеле до преквалификација и како доказите што во февруари биле оценети како речиси целосно обезбедени довеле до актуелниот обвинителен епилог.
Од партијата оценуваат дека случајот отвора прашања за начинот на кој се водат најавуваните постапки против високата корупција и додаваат дека јавноста не смее да добива „спектакл на почетокот, слабеење по пат и епилог несразмерен на вревата“.
