Од партијата Левица преку соопштение реагираат на начинот на кој се постапува по предметот „Талир 2“, оценувајќи дека различни критериуми се применуваат кога станува збор за континуитетот во обвинителството.
Од Левица потсетуваат дека во 2022 година, во првостепената постапка, Никола Груевски беше осуден на шест години затвор, а судот определи и конфискација на партиското седиште и друг имот на ВМРО-ДПМНЕ. По измените на Кривичниот законик и одлуката на Апелација за укинување на пресудата, предметот беше вратен на повторно судење, по кое Груевски беше ослободен, а барањето за конфискација беше одбиено.
Од Левица особено го проблематизираат потегот на новиот државен јавен обвинител Ненад Савески, кој пред завршницата на предметот ги повлекол овластувањата на обвинителката која седум и пол години го градела и застапувала случајот.
Според партијата, дополнителни прашања отвора и фактот што жалбата на Обвинителството повторно му е доделена на Јован Цветановски, со образложение дека тоа е согласно внатрешната процедура бидејќи претходно постапувал по предметот.
„Каква чудесна грижа за континуитетот! Кога требаше да се тргне обвинителката што седум и пол години го градела предметот – континуитетот не вредеше ни пет пари“, наведуваат од Левица.
Од партијата посочуваат дека Цветановски во 2023 година, кога постоела осудителна пресуда и определена конфискација, побарал таа да биде укината и предметот да биде вратен на повторно судење. Сега, по ослободителната пресуда и одбивањето на конфискацијата, истиот обвинител треба да постапува по жалбата со која Обвинителството го оспорува таквиот исход.
Од Левица бараат обвинителството да објасни како се применува принципот на континуитет и зошто тој не важел при промената на обвинителот кој со години го водел предметот, а сега се применува при повторното доделување на жалбата.
Партијата оценува дека случајот е особено значаен поради имотот кој е предмет на конфискација и фактот што кривичното гонење се приближува кон застарување.
