Левица: Скопје беше кренато од урнатините - денес го затрупуваат дивоградби и корупција

По повод 63-годишнината од катастрофалниот земјотрес во Скопје, делегација на Левица, составена од потпретседателот и пратеник Реџеп Исмаил, пратеникот Амар Мециновиќ и советничката во Советот на Град Скопје Дарја Мустафаоглу, положи свежо цвеќе на споменикот посветен на жртвите од трагедијата.

— реклама —

Од партијата оценуваат дека Скопје по земјотресот било обновено како град создаден според потребите на граѓаните, додека денес, според нив, урбанистичкиот развој е подреден на приватни интереси и профит.

Во соопштението се наведува дека урбанистичките планови сè почесто стануваат предмет на политички и бизнис-договори, а јавниот интерес се потиснува во корист на, како што велат, дивоградбите и корупцијата.

— реклама —

Од Левица сметаат дека поуката од земјотресот во 1963 година била градот да се развива одговорно и плански, но тврдат дека денес таквиот пристап е заменет со краткорочни интереси и неконтролирана урбанизација.

— реклама —

Партијата упати критики и до актуелните функционери, оценувајќи дека одбележувањето на 26 Јули не треба да се сведува само на церемонии и положување цвеќе, туку да биде проследено со политики што ќе обезбедат безбедно градење, заштита на јавниот интерес и стручни урбанистички решенија.

Во реакцијата се посочува и дека неодамнешното невреме во Скопје, според нив, ја покажало ранливоста на градот и последиците од долгогодишната негрижа.

— реклама —

„Наша обврска е да не дозволиме градот на солидарноста да стане град на беззаконието“, порачуваат од Левица.