Левица: Со кривична пријава за финансиски криминал со МРТВ Цветковски ќе раководи со "Скопје 2028"

Левица преку соопштение обвини дека градоначалникот на Скопје, Орце Ѓорѓиевски, го назначил поранешниот директор на Македонската радио-телевизија, Марјан Цветковски, за директор на Фондацијата што треба да го реализира проектот „Скопје – Европска престолнина на културата 2028“, иако, како што наведуваат, Фондацијата сè уште не е законски формирана.

— реклама —

Од партијата посочуваат дека во Собранието дури сега започнува постапката за Предлог-законот со кој треба да се основа Фондацијата, а според предложените законски решенија директорот треба да го именува Управниот одбор, кој во овој момент не постои.

— реклама —

Левица оценува дека ваквото именување отвора сомнежи за законитоста на постапката и, според нив, укажува дека кадровските решенија биле однапред договорени.

Во реакцијата се потсетува и на периодот кога Цветковски раководеше со Македонската радио-телевизија, наведувајќи дека во 2019 година против него била поднесена кривична пријава од Управата за финансиска полиција поради сомнение за злоупотреба на службената положба. Од партијата наведуваат и дека ревизорските извештаи во тој период укажувале на финансиски проблеми и висока задолженост на јавниот сервис.

— реклама —

Според Левица, дополнителна загриженост предизвикуваат и одредбите од Предлог-законот, кои, како што тврдат, предвидуваат посебен режим за јавните набавки и концентрирани овластувања во рамки на Фондацијата.

— реклама —

Од партијата оценуваат дека проектот „Скопје – Европска престолнина на културата 2028“ треба да биде пример за транспарентност и отчетност, а не, како што наведуваат, пример за однапред донесени кадровски одлуки и приспособување на законските процедури.