Левица преку соопштение соопшти дека до партијата биле доставени пријава и фотографии од жители на селото Долни Балван, Општина Карбинци, во кои се изнесуваат сомнежи дека од сточарска фарма со години се испушта течен животински отпад во канал што се влева во реката Брегалница.
Според партијата, жителите веќе поднеле официјално барање до Државниот инспекторат за животна средина, барајќи итен вонреден инспекциски надзор, земање мостри од водата и поведување постапка доколку се утврдат неправилности.
Од Левица наведуваат дека, според приложените фотографии, шталата се наоѓа во непосредна близина на каналот, а на дел од снимениот материјал, како што тврдат, се гледа лице кое го турка животинскиот отпад кон водотекот. Во пријавата, според партијата, се наведува дека не станува збор за изолиран случај, туку за практика што трае подолг временски период.
Жителите, како што информира Левица, изразиле и сомнежи за можен судир на интереси поради наводни блиски врски меѓу сопственикот на фармата и овластен инспектор, поради што бараат постапката да ја води Државниот инспекторат за животна средина.
Од партијата предупредуваат дека Брегалница има значајна улога за наводнување на земјоделските површини во регионот, а во близина се наоѓаат и бунари за водоснабдување, поради што сметаат дека институциите треба навремено да реагираат и да ги испитаат сите наводи.
Левица бара Државниот инспекторат за животна средина итно да испрати инспектори на терен, да изврши вонреден надзор, да земе мостри од водата и, доколку се потврдат сомнежите, да преземе мерки согласно законските надлежности и да ја информира јавноста за исходот од постапката.
