Левица: Во ек на грејна сезона МЕПСО бара речиси двојна тарифа - Регулаторната комисија за енергетика да престане да ги остава граѓаните на цедило

Левица преку соопштение реагира на барањето на МЕПСО за речиси двојно зголемување на тарифата за пренос на електрична енергија, обвинувајќи ја Регулаторната комисија за енергетика (РКЕ) дека наместо да ги штити граѓаните, им оди во прилог на енергетските монополи.

— реклама —

Од партијата посочуваат дека МЕПСО за 2027 година бара регулиран приход од околу три милијарди денари, наспроти речиси две милијарди денари одобрени за 2026 година, иако се предвидува помала количина електрична енергија да поминува низ преносната мрежа.

Левица предупредува дека, доколку барањето биде одобрено, граѓаните би се соочиле со ново поскапување во период кога трошоците за греење веќе се зголемени. Од партијата наведуваат дека парното поскапело за пет отсто во јануари, а во август следувало дополнително зголемување од речиси шест отсто.

— реклама —

Од Левица бараат МЕПСО да даде отчет за управувањето со средствата што ги добива, посочувајќи дека Државниот завод за ревизија констатирал слабости во работењето на компанијата, меѓу кои неправилности при вработувањата и проблеми со управувањето со инфраструктурата.

— реклама —

Партијата ја критикува и работата на РКЕ, оценувајќи дека досегашните одлуки ја засилуваат загриженоста дека комисијата, предводена од Ацо Ристов, дејствува во интерес на власта, наместо да ги дисциплинира енергетските монополи.

Левица ја повика и министерката за енергетика Сања Божиновска да преземе одговорност, нагласувајќи дека Владата е сопственик на МЕПСО, а Министерството е одговорно за енергетската политика и функционирањето на државниот енергетски систем.

„Заштита е да се спречи неоправданото поскапување уште на изворот“, наведуваат од партијата, барајќи од РКЕ и министерката, наместо да бараат начин трошоците да ги платат граѓаните, да побараат одговорност од раководствата на енергетските компании и поголема ефикасност во системот.