Лицата со трајни здравствени оштетувања повеќе да не бидат принудени на секои шест месеци или една година да одат на нови прегледи за да го остварат правото на туѓа нега – ова е целта на промените што ги најави министерот за здравство, Азир Алиу.
Тој истакна дека во оваа фаза нема потреба од измени на законите, бидејќи постојната законска рамка веќе овозможува признавање траен инвалидитет. Според него, проблемот е во практичната примена и работењето на лекарските комисии.
„Работната група меѓу двете министерства нè извести дека не е потребна измена на Законот, бидејќи тој предвидува можност за траен инвалидитет. Но, треба повеќе да се работи со комисиите за реално да ги проценуваат случаите и таму каде што постои траен инвалидитет да издаваат трајни решенија“, рече Алиу.
Тој посочи дека пред неколку недели испратил допис до сите комисии со барање да ги анализираат случаите кај кои пациентите не треба повторно да се јавуваат на контроли.
„Некои пациенти имаат очигледни здравствени состојби, кои не можат да се подобрат. Ако пациентот нема нога, не може да нема траен инвалидитет. Ногата не расте“, нагласи министерот.
Првичните анализи покажале дека државата троши околу 1,4 милиони денари дополнителни средства за повторени прегледи на пациенти со трајни здравствени проблеми. Освен финансискиот товар, овие процедури претставуваат дополнително оптоварување и за пациентите и за нивните семејства.
Алиу најави дека по завршувањето на анализите ќе биде утврдена јасна динамика и правила за работењето на комисиите, а доколку се покаже дека постојат нејаснотии во прописите, не ја исклучува можноста и за законски измени.
