Литванија планира да испрати свои сили во меѓународната мисија за заштита на пловидбата низ Ормускиот Теснец, откако Државниот совет за одбрана ја одобри иницијативата.
Според кабинетот на претседателот, највисокото безбедносно тело во земјата поддржало распоредување до 40 припадници, војници и цивилен одбранбен персонал, кои би се приклучиле на сојузничките поморски операции во регионот.
Предлогот сè уште треба да добие зелено светло и од литванскиот парламент.
Во меѓувреме, иранскиот министер за нафта Мохсен Пакнеџад призна дека Иран се соочува со предизвици поради американската блокада на иранските пристаништа, но нагласи дека Техеран презел контрамерки.
„Во текот на 40 дена војна нашето производство не опадна, а извозот се одвиваше поволно“, изјави Пакнеџад за државната телевизија, без да открие детали за мерките што ги презела земјата.
Неговите тврдења делумно ги потврдува и анализата на ЦИА, според која Иран би можел да ги поднесува последиците од блокадата уште неколку месеци без сериозен економски колапс.
Според американските разузнавачки проценки, Техеран веројатно нема да почувствува неподнослив притисок пред крајот на летото, што објаснува зошто иранските власти и натаму инсистираат на укинување на блокадата како услов за траен мировен договор.
