Министерот за култура и туризам, Зоран Љутков, денеска на прес-конференција во Владата ги презентираше резултатите од работењето на Министерството во изминатите две години, оценувајќи дека културата и туризмот повторно станале значаен државен приоритет.
Според Љутков, во изминатиот период акцентот бил ставен на долгорочни и системски решенија, преку стратешко планирање, законски реформи, финансиска стабилизација и капитални инвестиции.
Тој посочи дека по преземањето на функцијата во 2024 година, бил наследен долг од 273 милиони денари по основ на плати во националните и локалните установи, како и институционален систем без јасни стратешки насоки. Со ребалансот на Буџетот, како што рече, биле обезбедени средства за сервисирање на обврските, дополнителни 71 милион денари за програмски активности и над 78 милиони денари за инфраструктурни проекти во општините.
Љутков информираше дека во завршна фаза се Националната стратегија за развој на културата, Националната стратегија за културно наследство и Националната стратегија за развој на туризмот, додека паралелно се подготвуваат измени на повеќе системски закони.
За првпат, посочи министерот, е воведен моделот на делегиран буџет во националните установи, кој годинава се применува во 28 институции.
Особено беше истакнат растот на средствата за Годишната програма во културата, кои од 768 милиони денари во 2023 година достигнале 1 милијарда и 71 милион денари во 2026 година, што претставува зголемување од речиси 40 проценти. Истовремено, сопствените приходи на националните установи се зголемени за над 150 проценти во споредба со 2023 година.
Во текот на изминатите две години реализирани се 320 нови вработувања и 35 унапредувања во националните установи, а повторно е воспоставен и конкурсот за креативни индустрии, преку кој се поддржани 108 проекти.
Во областа на филмската дејност, буџетот на Агенцијата за филм е зголемен од 100 милиони денари во 2024 година на 187 милиони денари во 2026 година.
Министерот информираше дека капиталните инвестиции во културата се зголемени од 230 милиони денари во 2023 година на 485 милиони денари во 2026 година, при што се реализираат повеќе проекти, меѓу кои Театарот во Струмица, реконструкцијата на киното „Партизан“ во Битола, Универзалната сала, Македонскиот народен театар и други објекти низ државата.
Во делот на туризмот, Љутков истакна дека буџетот е зголемен од 58 милиони денари во 2023 година на 186 милиони денари во 2026 година, а во завршна фаза е и Националната стратегија за развој на туризмот.
Според министерот, од вкупно 98 проекти и мерки предвидени во Владината програма во делот на културата, реализирани или во тек на реализација се 73, што, како што наведе, претставува исполнетост од 72 проценти.
„Ова не е само отчет за две години работа. Ова е доказ дека со визија, одговорност и системски пристап се поставуваат цврсти темели за посилни институции, подобро заштитено културно наследство, поконкурентен туризам и одржлив развој на културата“, изјави Љутков.
