Министерот за култура и туризам, Зоран Љутков, јавно одговори на обвинувањата на поранешната претседателка на Советот за македонски јазик, Симона Груевска-Маџоска, оценувајќи дека нејзината објава содржи селективно претставување на фактите и му нанесува штета на угледот на институциите.
„Со длабоко разочарување го прочитав вашиот објавен текст. Кога ја примив вашата оставка, се договоривме да ја избегнеме јавната полемика токму за да го заштитиме угледот на Советот за македонски јазик“, напиша Љутков.
Тој нагласи дека Владата и Министерството системски работеле на одбележувањето на 80-годишнината од кодификацијата на македонскиот стандарден јазик, преку координативно тело во кое учествувале повеќе институции, меѓу кои и Советот за македонски јазик.
„Не станува збор за ‘немање пари’, туку за координиран, институционален пристап кој ја надминува индивидуалната ангажираност. Непристојно е да ги девалвирате оние што сериозно се вложија во одбележувањето на јубилејот“, порача министерот, додавајќи дека Груевска-Маџоска за својата работа била соодветно платена.
Во однос на Националната стратегија за македонскиот јазик, Љутков посочи дека процесот траел подолго поради неговата сложеност и потребата од широки консултации, а не поради занемарување.
Тој ги отфрли и тврдењата дека немало комуникација, наведувајќи дека координативните тела и работните групи биле местата каде што се разгледувале сите суштински прашања.
„Македонскиот јазик е далеку поважен од чија било лична промоција и мора да остане над партиски и персонални пресметки“, истакна Љутков, додавајќи дека останува отворен за конструктивна соработка со сите кои, како што рече, искрено се грижат за македонскиот јазик и идентитетот.
