Министерот за култура и туризам Зоран Љутков порача дека македонскиот јазик не смее да биде предмет на дневнополитички пресметки, туку претставува национална вредност која заслужува доследна институционална заштита.
Говорејќи на надзорната расправа во Собранието посветена на примената на Законот за употребата на македонскиот јазик, Љутков истакна дека спроведувањето на законските одредби е обврска на сите институции.
Тој потсети дека Законот бил донесен со широк парламентарен консензус на почетокот на 2024 година, а кога ја презел функцијата министер, како што рече, Инспекторатот за употреба на македонскиот стандарден јазик сè уште не бил воспоставен, ниту постоеле услови за негово функционирање.
„Недоследната и нефункционална примена на Законот не започнала со оваа Влада. Таа е резултат на долгогодишно отсуство на системски пристап, институционална инерција и недоволна политичка волја. Затоа, денес треба да зборуваме со факти, а не со политички квалификации“, изјави Љутков.
Министерот информираше дека во изминатиот период е формиран Советот за македонски јазик, започната е подготовката на Националната стратегија за македонскиот јазик, континуирано се организираат лекторски испити, а за првпат е воспоставен Инспекторат за употреба на македонскиот стандарден јазик, во кој веќе се вработени инспектори што минуваат обука.
Тој додаде дека Владата ги задолжила институциите доследно да ги исполнуваат законските обврски во однос на ангажирањето лектори, а прибраните податоци ќе бидат основа за изработка на Националната стратегија.
Осврнувајќи се на меѓународната афирмација на македонскиот јазик, Љутков посочи дека моментално функционираат 12 лекторати по македонски јазик во 11 земји, а во последните три години се отворени нови лекторати во Тирана, Нитра и Неапол.
„Нашата обврска е македонскиот јазик да добие вистинска, жива и достоинствена институционална заштита. Почитта кон македонскиот јазик не се докажува со декларации, туку со институции што функционираат, со закони што се применуваат и со држава што доследно ги исполнува своите обврски“, порача министерот Љутков.
