Со инвестиција вредна над 1,3 милиони евра започнува реализацијата на проектот „CulTour Crossing Borders“, кој има за цел да ги поврзе културните и туристичките потенцијали на Македонија и Грција преку заедничка прекугранична рута.
На почетниот настан во Струмица присуствуваа министерот за култура и туризам Зоран Љутков и министерот за локална самоуправа Златко Перински, кои истакнаа дека проектот претставува значаен чекор во заштитата на културното наследство и развојот на туризмот.
Проектот, чија вкупна вредност изнесува 1.382.043 евра, ќе се реализира во период од две години во рамки на Програмата Интерег VI-А ИПА за прекугранична соработка со Грција. Македонските партнери ќе спроведуваат активности во вредност од 451.603 евра, додека Министерството за локална самоуправа обезбедува национално кофинансирање од над 90 илјади евра.
Во рамки на проектот се предвидени заштита и ревитализација на локалитетот Римски терми во Банско, изградба на потпорни ѕидови, поставување туристички инфо-пункт со фотоволтаичен систем, уредување на пристапните патеки и изградба на современа кровна конструкција за заштита на археолошките остатоци.
Министерот Перински оцени дека проектот е пример за успешно користење на европските фондови за локален развој и подобрување на туристичката понуда.
„Прекуграничната соработка создава можности за нови инвестиции, размена на искуства и проекти кои носат конкретни придобивки за граѓаните“, изјави Перински, посочувајќи дека Струмица во изминатиот период добила поддршка за 12 инфраструктурни проекти во вредност од над 335 милиони денари.
Министерот Љутков нагласи дека започнува нова фаза во валоризацијата на еден од најзначајните археолошки локалитети во државата.
„Нашата цел е културното наследство не само да биде зачувано, туку и да биде ставено во функција на развојот преку културниот туризам и нови можности за локалната заедница“, рече Љутков.
Проектот ќе ги поврзе локалитетите Антички Европос во Килкис, Дојранското Езеро и Римските терми во Банско во заедничка културно-туристичка рута, која ќе биде промовирана преку современи дигитални содржини и нови туристички решенија.
