Со првата јавна расправа одржана во Музејот на македонската борба во Скопје, официјално започна процесот на изработка на Националната стратегија за развој на туризмот на Македонија за периодот 2027–2032 година.
На настанот се обрати министерот за култура и туризам Зоран Љутков, кој оцени дека новата стратегија претставува важен чекор кон создавање модерен, одржлив и конкурентен туристички сектор. Тој истакна дека туризмот има значајна улога во економскиот развој на државата преку отворање нови работни места, привлекување инвестиции и промоција на земјата на меѓународен план.
Според Љутков, во услови на брзи глобални промени и нови потреби на туристите, неопходен е стратешки пристап што ќе овозможи долгорочен развој на туристичката индустрија.
„Македонија располага со исклучителни природни и културни богатства, а наша задача е тој потенцијал да го претвориме во силна конкурентска предност и препознатлив туристички бренд“, порача министерот.
На јавната расправа присуствуваа претставници на туристички агенции, хотелиери, туристички водичи, угостители, локални самоуправи, стопански комори, туристички здруженија, како и претставници од академската заедница и експерти од областа на туризмот.
Во наредниот период се предвидени дополнителни јавни консултации и тематски работилници со сите засегнати страни, со цел да се обезбеди широк консензус во креирањето на идните политики за развој на туризмот.
Новата стратегија ќе биде фокусирана на рамномерен регионален развој на туризмот, ефикасен дестинациски менаџмент, заштита и одржливо користење на природното и културното наследство, дигитализација и модерна туристичка промоција, развој на нови туристички производи и подобрување на квалитетот на услугите и човечките ресурси во секторот.
Од Министерството за култура и туризам нагласуваат дека процесот ќе биде транспарентен и инклузивен, со активно учество на стручната јавност и туристичкиот сектор во дефинирањето на идниот развој на туризмот во државата.
