Министерот за култура и туризам Зоран Љутков во Брисел порача дека македонската култура претставува „жива ризница на духот“ и силно одекнува во срцето на Европа.
На концертот на Националниот џез-оркестар, во рамки на манифестацијата „Денови на македонската култура“ во Белгија, тој истакна дека културата е најмоќниот мост за поврзување меѓу народите.
Љутков нагласи дека настапот во културниот центар „Бозар“ е доказ за современата трансформација на македонската уметност, која, како што рече, произлегува од традицијата, но комуницира со современите европски културни текови.
Тој ја оцени програмата на манифестацијата како значаен придонес кон културната дипломатија, посочувајќи ги настапите на Националната опера и балет во Антверпен, проекцијата на филмот „Исцелител“ и најавената изложба во Европскиот парламент.
Министерот се осврна и на значењето на македонскиот јазик, кој, според него, е носител на културната меморија и идентитетот, нагласувајќи дека неговото чување и негување е национална обврска.
