Зоран Љутков од селото Разловци порача дека „Македонија предолго живееше со страв да не навреди некого ако се сака себеси“, на одбележувањето на 150-годишнината од Разловечкото востание.
На свеченоста, министерот оцени дека Разловци претставува „највисок пантеон на македонскиот опстој“ и симбол на непокорот што, како што рече, никој не успеал да го замолчи.
Во своето обраќање, Љутков нагласи дека Разловечкото востание е еден од темелите на македонската борба за слобода и државност, додавајќи дека токму таму бил разгорен жарот што подоцна прераснал во поширок ослободителен бран низ Македонија.
„Јунаците од Разловци не ја победија Империјата, но ја победија тишината, а тишината е најстрашната форма на ропство“, истакна министерот.
Од Министерство за култура и туризам информираа дека за целосна реконструкција на Спомен-домот на Разловечкото востание биле издвоени околу 25 милиони денари, а поставена е и нова музејска поставка со фотографии и артефакти поврзани со востанието.
Љутков им оддаде почит на Димитар Поп Георгиев Беровски, Поп Стојан Карастоилов, Илија Марков – Дедо Иљо Малешевски, Никола Скрижовски и на сите учесници во востанието, оценувајќи дека нивното дело останува симбол на македонскиот непокор и стремеж кон слободата.
