Објава на социјалната мрежа Х, зад која стои профилот под псевдонимот „Man from Skopje“, предизвика бројни реакции откако авторот ги сподели своите согледувања за квалитетот на станбената изградба во Скопје.
Тој тврди дека во текот на годините видел, снимил, продал или посетил повеќе од 1.800 станови и над 230 згради што на пазарот се рекламираат како луксузни, по што извлекол едноставен заклучок – луксузот кај нас најчесто завршува на фасадата.
„Однадвор мермер, ЛЕД-осветлување и рендери како од Дубаи, а одвнатре тенки ѕидови, слаба звучна изолација и технички решенија кои не одговараат на реалните потреби на станарите“, наведува авторот на објавата.
Тој посочува дека во многу новоградби може да се слушне секојдневниот живот на соседите, дека климатизацијата често е поставена според расположливиот простор, а не според функционалноста, како и дека дел од заедничката инфраструктура покажува недостатоци уште пред целосното вселување на станарите.
Според него, во домашните услови поимот „луксуз“ пречесто се сведува на атрактивен влез и висока цена по квадратен метар, додека вистинскиот квалитет се огледа во комфорот и функционалноста на живеењето.
„Вистински луксуз е кога не го слушате соседот, кога не ви дува климата директно во глава, кога цевките не тропаат навечер и кога домот ви нуди мир и приватност“, наведува тој.
Објавата отвори дискусија меѓу корисниците на социјалните мрежи, од кои дел ги потврдуваат ваквите искуства, додека други сметаат дека на пазарот постојат и квалитетни проекти, но дека купувачите треба многу повнимателно да ги проверуваат деталите зад привлечните фасади и маркетиншките пораки.
