Македонската музичка легенда Маја Оџаклиевска ќе биде дел од големиот музички спектакл со светскиот оперски великан Хозе Карерас, кој ќе се одржи на 1 септември на Плоштад Македонија во Скопје.
Од „Авалон продукција“ соопштија дека Оџаклиевска се приклучува на македонскиот „дрим тим“, кој го сочинуваат и Миле Кузмановски, Сузана Спасовска, Наум Петрески, Каролина Гочева, Калиопи, Влатко Стефановски, како и Ана и Игор Дурловски.
Големиот концерт е најавен како еден од најзначајните музички настани во земјава, со кој ќе бидат обединети повеќе генерации македонски музичари и публика.
Настанот ќе започне во 20 часот, а влезот за сите посетители ќе биде бесплатен и отворен.
Концертот е дел од програмата за одбележување на 35 години независност на Македонија, а организаторите најавуваат вечер исполнета со македонски музички хитови и настап на еден од најпознатите светски тенори.
