Вицепремиерот и министер за транспорт Александар Николоски изјави дека извештајот на Светската банка, според кој Македонија бележи најголем раст на авиосообраќајот и туризмот во Европа и Централна Азија, претставува поттик за уште поголема работа и посветеност.
Тој истакна дека Македонија, и покрај глобалните предизвици, остварила рекордни резултати во авиосообраќајот и туризмот, што е препознаено и во анализата на Светската банка.
Според Николоски, со годишен раст од 40 проценти на пристигнувањата на патници, Македонија е издвоена како најуспешна земја во Европа и Централна Азија во оваа област.
Тој нагласи дека мерката за субвенционирање на нови авиолинии придонела за привлекување поголем број туристи и за дополнителен економски развој преку туризмот.
Како пример за позитивните резултати, Николоски го посочи и охридскиот аеродром, каде во еден ден биле опслужени повеќе од 3.000 патници, што, според него, претставува рекорд за аеродром со таков капацитет.
„Продолжуваме со уште повеќе инвестиции во авиосообраќајот и туризмот“, порача Николоски.
