Македонија и Катар ќе ги продлабочуваат односите во областа на правосудството

Министерот за правда Јетон Шасивари оствари средба со вршителот на должноста во Амбасадата на Државата Катар, Рашид бин Саед Ал-Хајарин, на која биле разгледани можностите за унапредување на билатералните односи и проширување на соработката во правосудството.

— реклама —

Шасивари ја нагласил потребата од воспоставување директна соработка со Министерството за правда на Катар и неговите специјализирани институции. Меѓу приоритетните области ги посочил обуката на правните професионалци, борбата против корупцијата и финансискиот криминал, како и дигитализацијата на правосудниот систем.

— реклама —

Како основа за понатамошно унапредување на односите биле посочени политичките консултации одржани во Доха во јули 2026 година и потпишувањето на Меморандумот за соработка во областа на трудот во септември годинава.

— реклама —

На средбата, министерот изразил интерес за разгледување можности за техничка и финансиска поддршка на приоритетни проекти поврзани со реформите во правосудството, со цел договорената соработка да се преточи во конкретни активности и мерливи резултати.

Од Министерството за правда посочуваат дека целта е односите со Катар да се прошират надвор од дипломатскиот дијалог и да донесат конкретни придобивки за институциите и граѓаните на двете држави.