Македонија и Северна Рајна-Вестфалија потпишаа декларација за соработка во економијата, образованието и културата до 2030 година

Република Македонија и германската сојузна покраина Северна Рајна-Вестфалија потпишаа нова Заедничка декларација за намери за соработка за периодот 2026–2030 година, со која се отвора нова фаза во билатералните односи и се потврдува заложбата за натамошно продлабочување на партнерството.

— реклама —

Документот беше потпишан во рамки на средбата меѓу министерот за надворешни работи и надворешна трговија Тимчо Муцунски и министерот за федерални, европски, меѓународни работи и медиуми на Северна Рајна-Вестфалија, Натанаел Лимински.

Муцунски оцени дека посетата претставува продолжение на интензивниот дијалог со една од најзначајните германски покраини и важен чекор кон понатамошно јакнење на меѓусебните односи.

— реклама —

Соговорниците изразија задоволство од досегашната соработка, нагласувајќи ги резултатите постигнати во повеќе области, меѓу кои економијата, инвестициите, внатрешните работи, образованието и културата.

— реклама —

Со новата декларација се потврдува заедничката посветеност за продолжување и унапредување на одличната билатерална соработка воспоставена со претходниот документ, а посебен акцент е ставен на продлабочување на економските врски и создавање нови можности за инвестиции од Северна Рајна-Вестфалија во земјава.

„Убеден сум дека оваа декларација ќе отвори нова фаза во меѓусебната соработка и ќе придонесе за поголемо поврзување на деловните заедници и дополнително јакнење на економските односи“, истакнал Муцунски.

— реклама —

Тој се заблагодарил и за континуираната поддршка што германската покраина ѝ ја дава на европската интеграција на државата, посочувајќи дека документот предвидува соработка и во области што ќе придонесат кон усогласувањето со европското законодавство и напредокот на евроинтегративниот процес.