Зголемувањето на економската соработка, трговската размена и привлекувањето нови инвестиции беа во фокусот на средбите што вицепремиерот и министер за транспорт Александар Николоски ги оствари со турските министри за трговија и транспорт во рамки на Македонско-турскиот бизнис форум во Истанбул.
Николоски разговараше со министерот за трговија на Турција, Омер Болат, и министерот за транспорт и инфраструктура, Абдулкадир Уралоглу, при што беа потврдени заедничките заложби за продлабочување на економските односи и создавање нови можности за соработка меѓу двете држави.
На средбата станало збор за конкретни чекори за зголемување на трговската размена, поттикнување на инвестициите и подобрување на деловната клима за компаниите од Македонија и Турција.
„Турција е еден од најзначајните економски и трговски партнери на Македонија. Долгогодишните пријателски односи се темел врз кој успешно се развива и економската соработка. Целта е овие односи да ги подигнеме на уште повисоко ниво преку нови иницијативи и зголемена економска активност“, истакнал Николоски.
Посебен акцент бил ставен на инфраструктурниот развој и регионалното поврзување. Вицепремиерот посочил дека во земјава се реализира најобемниот инвестициски циклус за изградба и модернизација на инфраструктурата и ги повикал заинтересираните турски компании да учествуваат на меѓународните повици.
Соговорниците се согласиле дека Македонија и Турција ќе продолжат да градат партнерство засновано на доверба, пријателство и заедничка визија за економски развој и поголема регионална соработка.
