Откако авионот „Боинг 737“ на „Рајанер“, со сериозно оштетен десен мотор и скршен прозорец, безбедно се врати во Солун, многумина очекуваа Грција да ја води истрагата за инцидентот. Сепак, американскиот Национален одбор за безбедност во сообраќајот (NTSB) соопшти дека назначил свој претставник за да ѝ помогне на Македонија, која официјално ја предводи истрагата.
Причината лежи во правилата на Меѓународната организација за цивилно воздухопловство (ICAO), според кои безбедносната истрага ја води државата во чиј воздушен простор се случил сериозниот инцидент. Според досегашните информации, инцидентот со летот FR1879 се случил над Македонија, поради што токму таа е надлежна за постапката.
Во истрагата, покрај Македонија, ќе учествуваат и Грција, каде што авионот се наоѓа на технички преглед, Малта, како држава на регистрација и оператор на летот, САД преку NTSB како земја на производство на авионот, како и компаниите „Боинг“ и CFM International, производител на моторите.
Истражителите ќе ги анализираат податоците од црните кутии, техничката документација, оштетувањата на авионот и моторот, како и сите пронајдени делови, за да утврдат што точно довело до дефектот, оштетувањето на трупот и кршењето на прозорецот во патничката кабина.
Иако во постапката учествуваат повеќе држави и компании, конечниот извештај ќе го подготви и објави исклучиво надлежниот истражен орган на Македонија, согласно правилата на ICAO.
