Македонските превозници најавуваат протест поради проблемот со ограничувањето на престојот на професионалните возачи во Шенген-зоната на 90 дена во рамките на 180 дена. Од „Макам-транс“ информираат дека на состанокот одржан на 21 август е потврдена организацијата на двочасовен протест на 31 август.
Протестот во Скопје ќе се одржи пред седиштето на Делегацијата на Европската Унија, во периодот од 12 до 14 часот, со учество на најмалку 20 возила и поголем број превозници, возачи и други вработени од различни градови во државата.
Истовремени протести се најавени и во Србија, Босна и Херцеговина и Црна Гора. Акцијата ќе се одржи непосредно пред состанокот на работната група во Брисел, закажан за 1 септември, на кој треба да се разговара за проблемот со престојот на професионалните возачи во Шенген-зоната.
Од „Макам-транс“ велат дека доколку на состанокот не биде постигнато преодно решение, се предлага нов протест на граничните премини, кој би започнал на 14 септември. За неговото одржување потребна е согласност од превозниците во секоја од земјите, како и одобрение од надлежните институции.
Според најавите, овој протест би можел да биде сличен на оној од јануари годинава и да трае подолго од 10 дена. Асоцијациите од четирите држави во моментов собираат поддршка од превозниците за неговата организација.
Од „Макам-транс“ посочуваат дека Европската Унија во изминатите седум месеци не покажала доволно волја за решавање на проблемот, иако во визната стратегија професионалните возачи се препознаени како лица кои вршат професионална дејност.
Во случај на протест на граничните премини, превозниците планираат да побараат да биде овозможено непречено минување на стоки од особен интерес за државата и граѓаните. Меѓу нив се наведуваат нафтата и нафтените деривати, јагленот, потребните орудија и препарати за општините и јавните претпријатија, муницијата и други стоки.
За да се утврди поддршката меѓу превозниците, „Макам-транс“ спроведува анкета. За организација на протестот е потребна согласност од најмалку 70 проценти од превозниците во државата.
