Граничните премини кон Европската Унија би можеле да се соочат со блокади од 14 септември, доколку не биде постигнато решение за проблемот со престојот на професионалните возачи од земјите што не се членки на ЕУ во Шенген-зоната.
Камионџии од Србија, Македонија, Босна и Херцеговина и Црна Гора најавуваат прекин на товарниот сообраќај, револтирани од примената на правилото „90 дена во 180 дена“. Со него, државјаните на земји надвор од ЕУ имаат ограничен престој во Шенген-зоната, што превозниците го оценуваат како сериозна пречка за професионалните возачи.
Тие бараат посебен режим за возачите во меѓународниот транспорт, бидејќи нивниот престој во земјите од Шенген е поврзан со работните обврски, а не со туристички патувања.
Во Србија веќе е потврдена можноста за блокада на граничните премини, а во акцијата се очекува да се приклучат и превозниците од Македонија, Босна и Херцеговина и Црна Гора.
Претседателот на Здружението за меѓународен транспорт на Србија, Неѓо Мандиќ, вели дека превозниците не сакаат да дојде до блокади, но дека проблемот станал сериозен за транспортните компании.
„Практично остануваме без возачи и самите сме блокирани, бидејќи не можеме да работиме“, изјавил Мандиќ, додавајќи дека контролите на границите се заострени и дека возачите се враќаат дури и кога дозволениот престој е надминат само за еден ден.
Мандиќ признава дека блокадата би значела финансиска загуба и за превозниците, но смета дека без дополнителен притисок тешко ќе се стигне до решение во краток рок.
Претставници на транспортните здруженија од четирите земји на 31 август протестираа пред претставништвата на Европската Унија во Белград, Сараево, Подгорица и Скопје. Македонските превозници претходно предупредија дека протестите би можеле да продолжат со блокада на граничните премини од 14 септември.
Превозниците предупредуваат дека евентуалниот прекин на товарниот сообраќај би можел да предизвика пошироки последици – од застои и доцнење на испораките до зголемени транспортни трошоци и нарушувања во синџирите на снабдување.
Главното барање е воспоставување посебен механизам за професионалните возачи од земјите надвор од ЕУ, со кој нивниот работен престој во Шенген-зоната би се разликувал од правилата што важат за туристите и останатите патници.
Доколку до 14 септември не биде постигнат договор, превозниците најавуваат запирање на товарниот сообраќај и блокирање на граничните премини кон ЕУ.
