Македонските превозници денеска излегуваат на протест пред Делегацијата на Европската Унија во Скопје поради проблемот со правилото 90/180 дена, кое им го ограничува престојот во Шенген-зоната и го отежнува непреченото извршување на нивната работа.
Протестот, организиран од Асоцијацијата „Макам-транс“, ќе се одржи од 12 до 14 часот, а на него се повикани да учествуваат превозници, професионални возачи, соработници и членови на асоцијацијата.
Од „Макам-транс“ велат дека преку протестот сакаат да испратат јасна порака дека за професионалните возачи е потребно соодветно решение кое ќе ги земе предвид специфичностите на нивната работа.
Тие бараат да им се овозможи непречено извршување на транспортната дејност и надминување на проблемите што произлегуваат од ограничувањето на престојот од 90 дена во период од 180 дена.
Од асоцијацијата ги повикуваат превозниците и возачите да се приклучат во што поголем број, со порака дека само со заеднички настап можат да извршат притисок за решавање на проблемот.
