Најавениот протест на превозниците од Македонија, Србија, Босна и Херцеговина и Црна Гора на 14 септември нема да се одржи, соопшти Асоцијацијата „Макам-транс“.
Одлуката следува по средба со претставници на дел од државите членки на Шенген-зоната, одржана преку Мисијата на Европската Унија со седиште во Белград. Превозниците, како што наведуваат, одлучиле да не ги затвораат граничните премини кон државите членки на ЕУ.
Од „Макам-транс“ велат дека со ваквата одлука покажале добра волја и разбирање за последиците што би можеле да настанат со прекинување на синџирот на снабдување со стока меѓу земјите од Западен Балкан и ЕУ.
Воедно, превозниците изразиле доверба во ветувањето дека ќе се забрза процесот за изнаоѓање соодветно решение за професионалните возачи и нивниот престој во Шенген-зоната подолг од дозволените 90 дена во период од 180 дена.
Од „Макам-транс“ очекуваат решение за ова прашање до изгласувањето на новата визна стратегија, планирано за втората половина на 2027 година.
Сите подготовки за спроведување на протестот, според соопштението, се ставаат вон сила за одреден период.
