Коул Томас Ален, маж обвинет за обид за атентат врз американскиот претседател Доналд Трамп за време на гала-вечерата на Здружението на дописници од Белата куќа, се согласил да остане во притвор до почетокот на судењето. Тој при краткото појавување пред судијката не се изјаснил за вината за нападот, кој го прекинал еден од најистакнатите годишни настани во Вашингтон.
Обвинителите тврдат дека Ален со недели го планирал нападот и преку интернет го следел движењето на Трамп, пред во саботата навечер да влезе во хотелот „Вашингтон Хилтон“ со огнено оружје, поминувајќи низ детектор за метал. Во инцидентот бил повреден и самиот Ален, но не од огнено оружје. Еден агент на Тајната служба бил застрелан, но преживеал благодарение на непробојниот елек. Според истрагата, постои сомнеж дека Ален испукал најмалку еден истрел од својата пушка, додека агентот возвратил со пет истрели. Засега не е официјално потврдено кој го испукал куршумот што го погодил заштитниот елек на агентот.
Во судските документи се наведува дека 31-годишниот Ален се фотографирал во својата хотелска соба неколку минути пред инцидентот, носејќи торба за муниција, футрола за пиштол и нож во обвивка. Властите објавија и порака што тој ја испратил до членови на семејството непосредно пред пукањето, во која се нарекува „пријателски федерален убиец“ и индиректно изразува незадоволство од потезите на администрацијата на Трамп.
Обвинителството тврди дека доказите јасно покажуваат оти Ален пукал во насока на агентот на Тајната служба, додека одбраната го оспорува тоа, наведувајќи дека случајот се темели на претпоставки и толкувања на неговите намери. Адвокатите истакнуваат дека во неговите пораки не бил директно спомнат Доналд Трамп и бараат негово пуштање на слобода.
Ален е дополнително обвинет и по две точки поврзани со употреба на оружје, меѓу кои и пукање при извршување насилен кривичен чин. Доколку биде прогласен за виновен само по обвинението за обид за атентат, му се заканува казна доживотен затвор.
