Маж е убиен во престрелка што се случила синоќа во Барселона, а според шпанските медиуми постојат индиции дека жртвата е српски државјанин.
Според информациите објавени од локалните медиуми, нападот се случил во неделата околу 21 часот, во внатрешниот двор на станбена зграда во населбата Зона Франка. Напаѓачот, кој бил облечен во црна облека, наводно испукал неколку куршуми во грбот на мажот, по што избегал од местото на настанот.
И покрај брзата реакција на соседите, медицинските екипи и припадниците на каталонската полиција, животот на повредениот не можел да биде спасен.
По инцидентот, полицијата го блокирала поширокото подрачје и започнала потрага по напаѓачот, но засега нема информации за приведени лица.
Шпанските медиуми наведуваат дека ова е втор вооружен инцидент во истиот кварт во последните неколку недели. Поради зачестените случаи на насилство, дел од жителите неодамна организирале протести, барајќи поголема безбедност и поефикасно полициско присуство.
Идентитетот на убиениот сè уште не е официјално потврден, но полициски извори, според локалните медиуми, посочуваат дека станува збор за лице кое најверојатно е државјанин на Србија.
Истрагата за мотивите и околностите на убиството е во тек.
