Големите пожари и натаму се активни во повеќе делови на Босна и Херцеговина, а во еден од пожарите кај Тешањ загина 77-годишен маж кој, според првичните информации, се обидувал сам да го изгасне огнот.
Неговото тело било пронајдено од пожарникарите за време на интервенцијата на пожар на ниска вегетација. Околностите за неговата смрт сè уште се утврдуваат.
Во меѓувреме, пожарникарите со недели се борат со огнените стихии низ земјата. Ситуацијата ја отежнуваат високите температури, сувото тло и долгото отсуство на врнежи.
Особено сериозна е состојбата во подрачјата во близина на границата со Хрватска. Активен е пожарот кај Босанско Грахово, на планината Рисовац, каде што е зафатено големо шумско подрачје. Во гаснењето, поради близината на границата, се вклучени и хрватски канадери.
Голем пожар беснее и на Пљешевица кај Бихаќ. Теренот е непристапен и мински сомнителен, па во гаснењето е ангажиран и хеликоптер на Вооружените сили на БиХ.
Тешка е состојбата и кај Иванца, во близина на Дубровник, каде што пожарот се приближил до хрватската граница. Во гаснењето учествувале и пожарникари од Дубровник и Жупа Дубровачка.
Пожари се активни и во подрачјата на Цазин, Пале-Прача, Невесиње и Коњиц, како и во околината на Мостар и Чапљина.
