Најмалку пет лица, меѓу кои и едно дете, загинале во нови напади и вооружени инциденти во Појасот Газа, соопштија палестински здравствени извори.
Според нивните информации, четворица Палестинци, меѓу кои две жени и едно дете, загинале во израелски воздушен напад врз станбена зграда во градот Газа. Нападот се случил во населбата Сабра, каде што бил уништен стан, а повеќе лица се здобиле со повреди.
Лекарски извори наведуваат дека во одделен инцидент била убиена жена во северниот град Беит Лахија, откако израелските сили отвориле оган во таа област.
Израелската армија засега не ги коментирала овие настани.
Иако примирјето постигнато во октомври придонесе за намалување на големите вооружени судири меѓу Израел и Хамас, нападите и натаму продолжуваат. Според Министерството за здравство во Газа, од почетокот на примирјето досега во израелски напади загинале повеќе од 1.010 Палестинци.
Од друга страна, израелските власти тврдат дека операциите се насочени кон спречување на потенцијални напади од Хамас и други вооружени групи во енклавата.
Во меѓувреме, преговорите за следната фаза од мировниот план за Газа се соочуваат со застој. Планот предвидува разоружување на Хамас и повлекување на израелските сили, но засега нема значителен напредок во неговата реализација.
