Мерц: „Денес не би им препорачал на своите деца да студираат во САД“

Германскиот канцелар Фридрих Мерц денеска ги повика младите добро да размислат пред да одлучат да студираат или работат во Соединетите Американски Држави, оценувајќи дека Германија нуди подобри долгорочни перспективи.

— реклама —

„Денес на своите деца не би им препорачал да одат во САД за таму да се школуваат и работат“, изјави Мерц на собир на германските католици во Вирцбург.

Тој додаде дека во Америка се развила „поинаква општествена клима“.

— реклама —

„Дури и најобразованите луѓе во САД денес имаат големи потешкотии да најдат работа“, рече германскиот канцелар.

— реклама —

Мерц им порача на младите учесници на настанот дека германската социјална пазарна економија, и покрај економските последици од меѓународните конфликти и војни, и понатаму нуди силни можности, вклучително и работнички права за учество и одлучување на сите нивоа.

„Сакам сите да нè охрабрам да останеме оптимисти и да веруваме дека можеме да успееме и покрај бројните предизвици“, изјави Мерц.

Тој нагласи дека цврсто верува оти има малку држави во светот кои нудат толку големи можности за младите како Германија.