Германскиот канцелар Фридрих Мерц изјави дека нацистичкото минато на Германија не дозволува соработка со крајнодесничарски политички сили, предупредувајќи на растот на екстремната десница во земјата.
Говорејќи на бизнис-конференција во Берлин, Мерц ја отфрли можноста за соработка со партијата „Алтернатива за Германија“ (АфД), која според дел од анкетите бележи раст на поддршката и ја надминува неговата конзервативна ЦДУ.
Канцеларот потсети на улогата што ја имала ЦДУ во обновата на Германија по Втората светска војна и се осврна на првиот повоен канцелар на Западна Германија, Конрад Аденауер.
„АфД сака да се врати во времето пред Аденауер. Со Аденауер успеавме да ја оставиме зад нас Германија од ерата на фашизмот. Јас нема да ја водам Сојузна Република Германија, ниту мојата партија, назад во времето пред Аденауер“, порача Мерц.
Осврнувајќи се на економските предизвици, германскиот канцелар истакна дека не очекува нагол економски подем кој веднаш ќе ги реши сите проблеми, но најави сеопфатни реформи во здравствениот, даночниот и пензискиот систем во текот на оваа година.
Мерц нагласи дека неговата влада има обврска повторно да покаже дека демократските институции функционираат ефикасно, признавајќи дека кај дел од граѓаните постои оправдано разочарување поради бавното носење одлуки.
„Свесен сум за тоа и за големината на задачата што е пред нас“, изјави германскиот канцелар.
