Мерц: Србија мора да избира помеѓу Европа, Русија и Кина

Европските лидери на самитот ЕУ – Западен Балкан во Тиват ја потврдија својата посветеност на проширувањето на Европската Унија, но истовремено испратија јасна порака до Србија дека нејзиниот напредок кон членството зависи од спроведувањето на реформи и усогласувањето со надворешната и безбедносната политика на Унијата.

Германскиот канцелар Фридрих Мерц порача дека Белград мора јасно да одлучи каде ја гледа својата иднина.

— реклама —

„Не е можно да се води политика на колебање меѓу Русија, Кина и Европа. Патот на Србија кон Европската Унија е отворен, но таа мора да одлучи на чија страна ќе биде“, изјави Мерц пред новинарите во Тиват.

Српскиот претседател Александар Вучиќ потврди дека на состаноците со повеќе земји повторно го отвориле прашањето за воведување санкции кон Русија поради војната во Украина.

— реклама —

„Тоа го бараа од нас“, изјави Вучиќ, оценувајќи ги разговорите како позитивни.

Тој посебно ја поздрави француско-германската иницијатива за забрзување на процесот на проширување на Европската Унија.

— реклама —

Претседателката на Европската комисија Урсула фон дер Лајен нагласи дека Србија има јасно дефинирани услови за отворање нови преговарачки поглавја. Меѓу нив се реформите во владеењето на правото, слободата на медиумите, изборното законодавство и усогласувањето со заедничката надворешна и безбедносна политика на ЕУ.

Претседателот на Европскиот совет Антонио Кошта изјави дека српските власти се обврзале на конкретна временска рамка за спроведување на реформите, по што Европската комисија ќе изготви проценка, а земјите членки ќе одлучат дали ќе се отвори нов круг од преговорите.

На самитот уште еднаш беше истакната Црна Гора како најнапреден кандидат за членство во Унијата. Европските претставници оценија дека земјата има реални шанси да стане следна членка на ЕУ доколку продолжи со реформскиот процес.

Во Тиват се собраа лидерите на сите шест земји од Западниот Балкан – Црна Гора, Србија, Босна и Херцеговина, Албанија, Македонија и Косово, заедно со претставници на Европската Унија и повеќето земји членки.