Мерц тоне во негативата: Германскиот канцелар со најлош рејтинг досега

Поддршката за германскиот канцелар Фридрих Мерц продолжува да опаѓа, покажува најновото истражување спроведено за германската телевизија ZDF. Неговиот рејтинг достигна најниско ниво досега, додека опозициската АфД би била прва доколку изборите се одржат следната недела.

На скалата од +5 до -5, Мерц добил просечна оценка од -1,9, што е негов најслаб резултат откако се спроведува истражувањето. На крајот на јули неговата оценка изнесувала -1,5.

— реклама —

На врвот на листата на највлијателни германски политичари и натаму е министерот за одбрана Борис Писториус од СПД, со оценка од 1,3. Вицеканцеларот и лидер на СПД, Ларс Клингбајл, останува во негативната зона со -0,6.

— реклама —

На дното се наоѓа копретседателката на АфД, Алис Вајдел, со оценка од -2,5.

Истражувањето покажува и значителна недоверба во рамките на партијата на Мерц. Дури 80 отсто од испитаниците сметаат дека ЦДУ не стои целосно зад својот лидер, а истото мислење го делат и 67 отсто од симпатизерите на партијата.

— реклама —

Во случај изборите да се одржат следната недела, АфД би освоила 27 отсто од гласовите и би останала на првото место. ЦДУ би добила 22 отсто, што значи дека двете партии бележат пад од по еден процентен поен во споредба со истражувањето од крајот на јули.

Зелените, пак, се зголемиле за еден процентен поен и сега имаат 14 отсто поддршка. СПД останува на 12 отсто, колку што има и Левицата.

Истражувањето го спровел институтот „Вален“ од 17 до 19 август, телефонски и преку интернет, на примерок од 1.319 избирачи.