Поранешната германска канцеларка Ангела Меркел не била заинтересирана Доналд Трамп да победи на претседателските избори во САД во 2020 година, се наведува во декласифициран извештај на Националниот разузнавачки совет на САД, објавен на веб-страницата на Белата куќа.
Според документот, Меркел претпочитала победа на друг кандидат, пред сè поради личните несогласувања со Трамп, но и поради уверувањето дека политиките на неговата администрација ја отежнувале позицијата на Германија, Европската Унија и НАТО.
„Објавуваме серија претходно класифицирани проценки на американската разузнавачка заедница и други извештаи кои покажуваат дека нашата влада долго време била свесна за сериозни ранливости“, се наведува во соопштението.
Во извештајот се посочува дека односите меѓу Меркел и Трамп биле обременети со бројни несогласувања, особено околу надворешната политика, НАТО и справувањето со меѓународните кризи.
Се наведува и дека Меркел ги критикувала потезите на администрацијата на Трамп за време на пандемијата на коронавирусот. Според документот, на затворена видеоконференција со европските лидери таа оценила дека американските претседателски избори во 2020 година претставуваат еден од ризиците за Европската Унија.
Во меѓувреме, американскиот претседател Доналд Трамп неодамна повторно изнесе тврдења за странско мешање во изборите во 2020 година. Тој изјави дека Кина наводно имала пристап до податоци за 220 милиони американски гласачи и оцени дека странското влијание предизвикало сериозна штета врз изборниот процес.
Трамп, исто така, изјави дека Министерството за внатрешна безбедност идентификувало околу 278.000 регистрирани гласачи кои, според него, немале американско државјанство.
Прашањето за безбедноста на изборите и можните странски влијанија повторно е во фокусот на политичките дебати во Вашингтон, паралелно со преиспитувањето на односите на САД со сојузниците од периодот на првиот мандат на Трамп.
